Мусульманін сумленны і праўдзівы

Прыстойнасць – гэта ўніверсальны маральны прынцып, сутнасць якога ў тым, каб быць чалавекам слова. Намеры, словы і дзеянні такога чалавека знаходзяцца ў гармоніі паміж сабой. Вядома, сярод маральных нормаў ісламу важнае месца займае праўдзівасць, надзейнасць і сумленнасць.

Прарок Мухаммад ﷺ усталёўваў трывалую сувязь паміж верай і прыстойнасцю. Сваімі словамі: “Хто падманвае нас, той не з нас”,² – ён абсалютна не дапускае ў характары мусульманіна хлусні, нядобрасумленнасці, крывадушнасці. Паводле яго слоў, “той, хто верыць у Аллага і вечнае жыццё, павінен альбо казаць добрае, альбо маўчаць”. ³

Мусульманін у першую чаргу павінен быць верны свайму Госпаду, павінен засведчыць Яго існаванне і быць аддана прывязаным да Яго. А затым ён павінен быць паслядоўным у сваіх намерах і паводзінах, сваёй сумленнасцю дарыць давер навакольным. Захаванне прынцыпу сумленнасці, пазбягання хлусні ў сям’і, у гандлёвых адносінах, у бізнесе, у сферы адукацыі і навучання, у сяброўстве і нават у забавах і жартах, стварае і паступова ўмацоўвае грамадства даверу.