Ano ang Mga Limang Haligi ng Islam?

1. Shahada (Ang Pagpapatotoo) 

Mayroong limang haligi ng Islam,  ang una ay ang pagpapatotoo o pagpapahayag ng  pananampalataya, ang shahadah, isang  simpleng pormula na binibigkas ng lahat  ng mga nananampalataya: “Walang diyos  maliban sa Allah, at si Muhammad ay ang alipin at Sugo ng Allah.” Ang mga salitang  ito ay dapat bigkasin nang may tapat at matibay na pananalig  at hindi sa ilalim ng pamimilit.  Ang kahalagahan ng patotoong ito ay  ang paniniwala na ang tanging layunin  ng buhay ay maglingkod at sumunod sa  Diyos, at ito ay nakakamit sa pamamagitan ng pagsunod sa halimbawa ni Propeta  Muhammad (s.a.w.), ang sugo sa buong sangkatauhan hanggang sa Araw ng  Paghuhukom. Ang sinumang magpahayag  ng shahadah ay isang Muslim kahit na hindi  niya sinusunod ang iba pang mga tungkulin na ipinag-uutos sa mga Muslim sa  Islam. 

2. Salah (Limang Araw-araw na Pagdarasal) 

Ang pang-araw-araw na pagdarasal ay  isinasagawa ng limang beses sa isang araw  bilang isang tungkulin kay Allah. Pinalalakas  at pinalalalim nila ang paniniwala kay  Allah at binibigyang inspirasyon ang tao (na tumutok)sa mas mataas na moralidad. Ang salah ay  nagpapadalisay sa puso at pinipigilan ang madala sa mga tukso sa mga maling gawain at kasamaan.  Ang mga lalaking Muslim ay lubos na  hinihikayat na isagawa ang kanilang limang  araw-araw na pagdarasal sa moske nang  magkakasama. Ang mga babaeng Muslim  ay malayang magdasal kung saan ito  pinaka-maginhawa.  

3. Sawm (Pag-aayuno)  

Pinapanatili ng mga Muslim ang kahalagahan ng Ramadan,  ang buwan ng pag-aayuno, hindi lamang  sa pamamagitan ng pag-iwas sa pagkain,  inumin, at pagtatalik ng mag-asawa mula  madaling araw hanggang sa paglubog  ng araw kungdi pati na rin sa pag-iwas sa masasamang  hangarin at pagnanasa. Itinuturo nito ang  pagmamahal, katapatan, at debosyon. Nililinang nito ang isang maayos na konsensyang panlipunan, pagpapasensya, pagiging hindi makasarili, at  determinasyon. Tinutulungan  din nito ang mga mayayaman na  maunawaan ang kahirapan ng mga  nagdurusa sa gutom. 

4. Zakah (Pagpapadalisay ng Kayamanan) 

Ang pagsamba sa Islam ay hindi limitado sa  espirituwal na kaharian lamang. Ang mga  materyal na obligasyon ay ipinag-uutos sa mga  may kakayahang isagawa ito. Ang Zakah ay ang  taunang pagbabayad ng 2.5% ng netong  ipon at komersyal na ari-ariang mayroon ang isang tao sa loob ng isang taon bilang  tungkuling panrelihiyon at bilang pagpapadalisay  ng yaman ng isang tao. Ang kabuuan ay  direktang gagastusin sa mga mahihirap  na pangkat ng komunidad. Ang mga  Muslim ay kinakailangang tumulong sa  mga mahihirap, mga ulila, at nangangailangan sa pamamagitan ng pagbibigay sa kanila ng isang tiyak na halaga ng pera upang mapaginhawa ang kanilang  buhay sa pagtatangkang alisin ang hindi pagkakapantay-pantay (sa lipunan). Palaging  hinihikayat ng Islam ang mga Muslim  na ibahagi ang kanilang mga materyal  na pagpapala sa mga mahihirap.  Ang pinakamababa sa  pagbabahaging ito ay ang pagbibigay ng  zakah. 

5. Hajj (Banal na Paglalakbay sa Makkah) 

Ang tungkuling ito ay dapat gampanan  minsan sa isang buhay kung ang isang tao ay may mga kakayahang pangkalusugan at pinansyal upang magawa ito.  Sa nakalipas na 1,400 taon, ang Islamikong  himala ng tunay na kapatiran ng lahat  ng lahi at bansa ay nakitang nagaganap  habang ang mga Muslim ay nagtitipon para  sa banal na paglalakbay, Hajj, taun-taon sa sagradong  lungsod ng Makkah kung saan matatagpuan  ang Bahay ng Allah, ang Ka’bah. Bilang ang  tanging lugar ng hajj at direksyon  na hinaharap sa limang araw-araw na  pagdarasal, ang Ka’bah, na isang sinaunang  gusaling hugis kubiko mula pa noong  panahon ni Abraham, ay iniikot na ngayon ng humigit-kumulang tatlong milyong  Muslim bawat taon, na ang lahat ay nakasuot ng  puting damit, sa panahon ng Hajj. 

Ito ang mga ritwal na obligasyon sa Islam,  na ang bawat isa ay may panloob na  espirituwal na epekto sa mga tapat: samakatuwid, ang pananampalataya  at katapatan ay mahalagang bahagi ng  mga gawaing ito. Bilang karagdagan sa  mga ritwal na obligasyong ito, ang mga  Muslim ay nagsasagawa ng mga personal na  panalangin na tinatawag na dua.