Pinaniniwalaan ng mga Muslim na si Hesus (sumakanya nawa ang kapayapaan) ay isa sa mga Propeta ng Allah (Panginoon), na siyang ipinadala upang gabayan ang mga Anak ng Israel sa pamamagitan ng bagong banal na kasulatan. Sa katunayan, ang paniniwala sa lahat ng mga Propeta at Sugo ng Allah ay isang pangunahing saligan ng pananampalataya sa Islam. Ang Banal na Aklat ng mga Muslim, ang Qur’an, ay nagpapahayag:”Sabihin (O Muhammad): ‘Kami ay naniniwala sa Allah, at sa kung ano ang ipinahayag sa amin at kung ano ang ipinahayag kay Abraham (Ibrahim), Ismael, Isaac (Ishaq), Jacob (Yaqub), at ang mga Lipi, at sa (mga Aklat na) ibinigay kay Moises (Musa), Hesus (Isa), at sa mga propeta, mula sa kanilang Panginoon: Kami ay walang pagtatangi sa pagitan nila, at kay Allah kami nagpapasakop (sa Islam).” (Qur’an, 3/84) 

Si Hesus (Isa) ay itinuturing sa Islam bilang nauna kay Muhammad, at pinaniniwalaan ng mga Muslim na naihayag ang pagdating ng huling sugo. Sa katunayan, ayon sa Islamikong pananampalataya, ang orihinal na relihiyong itinuro ng lahat ng mga propetang ito mula pa noon ay ang Islam, na nangangahulugang mapayapang pagpapasakop sa Nag-iisang Panginoon. 

Ang isa pang bersikulo sa Qur’an (5/46) ay nagpapatunay na si Hesus ay sumusunod sa linya ng mga Propeta tulad ni Moises na nauna sa kanya: “At Aming ipinadala pagkatapos nila (ang mga naunang sugo) sa kanilang mga yapak si Hesus, na anak ni Maria, na nagpapatunay kung ano ang nauna sa kanya sa Torah at Aming ibinigay sa kanya ang Ebanghelyo kung saan mayroong gabay at liwanag, at nagpapatunay sa kung ano ang nauna rito sa Torah at isang gabay at isang babala para sa mga may takot sa Diyos.” 

Binanggit ang pangalan ni Hesus sa dalawampu’t limang lugar sa Qur’an. Tinatawag din siya nang may paggalang bilang “anak ni Maria; messiah; alipin ng Allah; sugo ng Allah.” Siya ay binanggit din bilang “ang salita ng Diyos”, “ang espiritu ng Diyos”, isang “tanda ng Diyos”, at maraming iba pang mga titulo ng karangalan na kumalat sa labinlimang magkakaibang mga kabanata.