Ang “Islam” ay isang salitang Arabo na nangangahulugang kapayapaan at  pagpapasakop. Ang isang nagsasanay  na Muslim ay nagsisikap na magpasakop nang buong puso sa Diyos, sa gayon ay makakamit ang kapayapaan sa buhay na ito gayundin sa kabilang buhay. Ang  “Muhammadanismo” (Mohammedanism)  ay isang maling pangalan para sa Islam at  lumalabag sa mismong diwa at mensahe  nito.  

Ang Islam ang pinakahuli sa tatlong  relihiyong Abrahamiko, na ang dalawang nauna ay  Hudaismo at Kristiyanismo. Dahil dito, ito  ay isang relihiyong batay sa rebelasyon na  nagbabanggit ng paniniwala sa Isang Diyos at sa gabay na ipinahayag ng Diyos sa  mga propeta. Ang mga propeta ng Islam ay  kinabibilangan nina Abraham,  Moises, Solomon, at Hesus: kung kaya’t ang  Islam ay hindi isang bagong relihiyon kungdi  ang panghuli at katuparan ng parehong pangunahing katotohanan na ipinahayag ng Diyos sa pamamagitan ng lahat ng Kanyang mga propeta sa bawat bayan (Qur’an, 3/84).  

Bandang taong 610 AD, isang  lalaking nagngangalang Muhammad ang  gumugugol ng oras mag-isa sa kuweba ng  Hira kung saan siya’y regular na dumadayo at nagpapakalayo mula sa pagmamadali ng abalang bayan ng  kalakalan ng Makkah upang pagnilayan ang  mga misteryo ng buhay. Si Muhammad (s.a.w.) ay kilala bilang “ang mapagkakatiwalaan”  sa kanyang mga kaibigan at kapamilya dahil sa kanyang palagiang dalisay at tapat  na pakikitungo sa iba. Malapit na sa pagtatapos  ng lunar na buwan ng Ramadan, noong gabi na ngayo’y kilala at  ipinagdiriwang bilang ang Gabi ng Qadr  nang ang mga rebelasyon ng Qur’an ay  nagsimulang ihatid sa pamamagitan ng  Arkanghel Gabriel kay Propeta Muhammad  (s.a.w.).  Patuloy siyang nakatanggap ng mga  rebelasyong ito sa loob ng dalawampu’t tatlong  taon. Ang mga bersikulo ay isinaulo  at isinulat ng mga kasam’t tagasunod ni  Propeta Muhammad (s.a.w.), at ito rin ang Aklat  (ang Qur’an) na binabasa ng mga Muslim  ngayon.  

Bilang karagdagan sa Qur’an, ang mga  Muslim ay may mga talaan ng buong buhay at mga  gawain ng Propeta (sunnah). Kabilang dito ang mga bagay tulad ng paraan ng pagdarasal at  wudhu  o paghuhugas ng katawan para sa pagsamba, ang mga detalye kung paano isagawa ang Hajj o ang paglalakbay sa banal na  lugar ng mga Muslim, at marami pang ibang  gawain na naglalarawan ng paniniwala sa isang  Diyos. Mayroon ding mga kasabihan at gawain ng  Propeta na nasaksihan ng mga tao noong panahong iyon at naisalaysay at naitala. Ang mga ito ay kilala  bilang hadith at nagsisilbing gabay kung paano  isabuhay ang relihiyong Islam.