Вера ў анёлаў

“Той, хто не верыць у Аллага, Яго анёлаў, Яго Пісанні, Яго пасланцоў і ў Апошні Дзень, той патрапіў у глыбокую аблуду”. ¹

(Святы Кур’ан)

Гісторыя чалавецтва поўная вераванняў у магутных і нябачных істот. Барацьба дабра і зла часта апісваецца на прыкладзе гэтых істот. Але наколькі праўдзіва апісанае ў іх? Толькі апошняя рэлігія, пасланая нашым Госпадам, Аллагам, можа даць нам дакладныя і праўдзівыя веды пра бачны і нябачны свет. У ісламе вера ў існаванне анёлаў, створаных з ну́ра (святла), з’яўляецца адной з апор іману.

Згодна ісламскаму веравучэнню, анёлы – гэта створаныя Аллагам істоты, якія выконваюць Яго даручэнні, падпарадкоўваючыся Яго запаветам пакорліва і беспярэчна. Анёлам не ўласцівы такія біялагічныя характарыстыкі як пол і патрэба ў ежы і пітве. У аятах Кур’ана згадваецца, што ў іх ёсць крылы, але нельга апісваць іх, прыпадабняючы да жанчын ці да птушак. Да таго ж, Кур’ан характарызуе іх як “рабоў Літасцівага Госпада”, выступаючы супраць вобразу анёлаў як жанчын.²

Анёлы адносяцца да розных груп у адпаведнасці з іерархічнай структурай і задачамі. Джабраіль (мір над ім), на якога Аллаг усклаў задачу перадаваць вах’ю (Боскае адкрыццё) Сваім прарокам; Мікаіль (мір над ім), які назірае за працэсамі прыроды – анёл пажытку і літасці; анёл смерці Азраіль (мір над ім); анёл Ісрафіль (мір над ім), які падзьме ў Рог, прадвяшчаючы Судны дзень, – гэта чатыры вялікія анёлы. Акрамя таго, ёсць і іншыя анёлы: носьбіты ‘Арша (Трона); анёлы-засцерагальнікі, якія абараняюць людзей; анёлы, якія моляцца за іх; анёлы-пісцы, якія запісваюць іх добрыя і дрэнныя ўчынкі; анёлы-пытальнікі, якія першымі сустракаюць людзей у магіле і дапытваюць іх; анёлы, якія служаць у Раі і Пекле.

Анёлы створаныя Усявышнім Аллагам, як і ўсе астатнія істоты. Яны ніколі не пярэчаць Яму, дзейнічаюць толькі паводле Яго волі і зага́даў. Яны не ведаюць больш за тое, пра што даў ім ведаць Аллаг. Таму яны аніяк не могуць лічыцца боствамі, аб’ектамі для пакланення або самастойнай кіруючай сілай.

Адна з асноўных рыс мусульманіна, які шчыра звязаны з Аллагам, заключаецца ў тым, што ён верыць у нябачнае, патаемнае (гайб). Вера ў анёлаў з’яўляецца часткай гэтай веры.

Чалавек, які верыць у анёлаў, шчаслівы, адчуваючы існаванне добрых істот, якія знаходзяцца побач з ім на кожным кроку жыцця ад нараджэння да самай смерці, ахоўваюць і клапоцяцца аб ім з дазволу Аллага. Дзякуючы анёлам, якія заклікаюць чалавека да дабра, рухаючыся наперадзе і ззаду яго, бароняць яго ад зла, падтрымліваюць яго, моляцца аб яго прабачэнні, ён жыве з надзеяй і ўпэўненасцю.